Faith Rally

KHUBOR NA KA MOTHER OF COMPASSION PARISH MAWKHLAM, NONGSTOIN DIOCESE:-

Dated: 24-09-2013

Ha 22 tarik 'Nailur, 2013 Ka Mother of Compassion Parish Mawkhlam ka la pynlong ïa ka Jingïaid-kynhun Phla Jingngeit ha kaba la ïashimbynta da baroh ki paid 'riewngeit jong ka Parish. Kane ka Jingîaid-kynhun Phla Jingngeit ka la sdang na ka Ïingmane Parish sha ka lynti PWD jong ka shnong Mawkhlam-Nongpyndeng da kaba rah ïa ka Diegphna, ka Baibyl, ki banner man la ki Balang shnong, ki placard bad ka jingpyrta ïa ki slogan jingngeit.
La leh ïa kane kum kawei na ki  kam kum ka kynhun 'riewngeit ka Parish ban rakhe ïa u Snem Jingngeit. Hadien ba la wanphai na ka Jingïaid-kynhun Phla Jingngeit I Babu Catechist Chrispin Kharbani jong ka Pyndengrei Parish I la ai jingkren halor "ka Jingngeit". I pynsngewthuh ïa ka daw ba la buh ïa une u snem jong ka jingngeit da kaba I la pynkynmaw na ka shithi u Jakob ba ka jingngeit khlem ki kam ka long lehnohei. I la shim ruh kiwei pat ki mat na ka Jingthoh Bakhuid ban ai ïa ka pasoh jingngeit ha ki 'riewngeit ki ba la wan ha kane ka sngi.

Ka Sakramen Jingpynskhem:

22 tarik 'Nailur, 2013: Ha kane ka sngi ka Mother of Compassion Parish ka la sngewdonbok shikatdei eh ba na ka bynta ka Sakramen Jingpynskhem, ha ka ba 121 ngut ki khynnah samla kiba pdiang Jingpynskhem ki la wan, la don arngut ki Bishop. I Bishop Victor Lyngdoh I la ai ïa ka Sakramen Jingpynskhem bad I la long ruh I Kongsan jong ka Mass bad I Bishop Salvador Lobo jong ka Baraipur Diocese I la kñia lang ryngkat bad ki phadar jong ka Parish. I Bishop Lobo I la wan sha Nongstoiñ Diocese ban ïalap ritrit ïa ki Lyngdoh trai-ri jong ka diocese kaba san sngi naduh ka 23 tarik 'Nailur. Shuwa ban pdiang ïa kane ka Sakramen la ai jinghikai ïa kine ki khynnah arsngi da arngut ki Catechist na Pyndengrei, I Babu Chrispin Kharbani bad Babu Paulus Nongphud. Ki la ïoh jinghikai halor ki nongrim jingngeit jong ka Balang bad ïa kiei kiei ba ki dei ban tip kum ki khun Ka.
Ka Parish ka sngewkmen ba ïoh bun ki khynnah mynta ka sien ka ba-ar kiba pdiang îa kane ka Sakramen.

Marcel Myrthong
President
Evangelisation Commission
Mother of Compassion Parish
Mawkhlam, Nongstoin Diocese,
West Khasi Hills District,
Meghalaya - 793119.   (marc.myrthong@gmail.com)