St. Francis de Sales Relic

KHUBOR NA KA MOTHER OF COMPASSION PARISH MAWKHLAM, NONGSTOIN DIOCESE- September, 2013:-

Dated: 18-09-2013

Ha 13 tarik 'Nailur, 2013 la wan rah ia ka Snap jong u Francis de Sales Bakhuid, Bishop & Doctor jong ka Balang. Ha ka por 1.30 nohsngi la pdiang burom ia une u 'riewkhuid da ki khynnah skul jong ka Don Bosco Mawkhlam lem bad katto katne ki paid 'riewngeit jong ka Balang.

Ka jingwanrah ia kane ka snap jong u Francis de Sales ka long ka bynta jong ka jingrakhe ia ka jingdap 175 snem jong ka jingseng ia ka jingiasyllok 'riewniam jong ki Missionaries of St. Francis de Sales (Phadar MSFS). Te kum shibynta ban rakhe ia kane ka Jubilee, la rah ia kane ka Snap ka ba la buh ha ka Jubilee Cross, na kawei ka Parish ba trei ki Phadar MSFS sha kawei pat. Na Guwahati la rah sha Parish Umwahlang, na Parish Umwahlang sha Parish Mawkhlam, na Mawkhlam kan leit sha Parish Mawryngkneng.

Bun ngut ki 'riewngeit na kylleng ki shnong bad Parish ba marjan ki la wan ban leh burom ia u ne u 'riewkhuid khamtam ban duwai kyrpad ha ka jingiasaid lem jong u. Ha ka 14 tarik 'Nailur 2013, ka sngi saitjain ba-ar jong u bnai ka ju don ka Convention hangne ha ka Holy Redeemer Retreat Centre, Mawkhlam. Kane ka Convention and Healing service ka la long ka ba kham kyrpang ha kane ka sien namar ka jingdon lang ka relic jong une u 'riewkhuid jong ka Balang. Ki jinghikai bad jingialap ha kane ka sngi ki long kham bun ha kaba iadei bad ka rukom hikai bad ka jingim jong u Francis de Sales Bakhuid. U Kongsan ka Mass Bd. ha kane ka sngi u la long u Ph. Cosmos Jyrwa, Rector jong ka St. Joseph Minor Seminary, Pyndengrei.

Ha ka 15 tarik la pynlong ka jingleh burom bad duwai kyrpad lyngba ka jingiasaid lem jong u Francis de Sales Bd. na ka bynta ki paid 'riewngeit jong ka Parish baroh kawei. Ha kane ka sngi ruh wat la ka mariang kam da thikna, bun ngut ki la wan. I Ph. Richard Iawphniaw, Vicar General jong ka Nongstoin Diocese I la long I kongsan jong ka Mass Bd.

U Francis de Sales u la long u wei na ki Stad ain Balang u ba la ia da bad pynim ia ka Balang khamtam eh na ki jinghikai bakla jong u John Calvin bad ki nongbud jong u. Shuwa ba un sa khlad noh na kane ka pyrthei hadien ba u la trei shitom khlem shongthait u la lah ban pynkylla Catholic biang haduh 72,000 ngut ki Calvinists (ki Katholik mynshuwa). Une u 'riewkhuid u la ong ba uno uno u lah ban long bariewblei, la u dei u bakhaii pateng, u khynnah, u samla, u longkpa, ka longkmie, ne uba don ha kano kano ka kyrdan jong ka jingim. Ym dei tang ki lyngdoh bad ki riewniam kiba lah bad ki badei ban long ki bariewblei ne 'riewkhuid. U la ong ruh ba ngi lah ban leh riewblei ha ka jingjar-jar ka dohnud wat hapdeng ba ngi dang trei dang ktah, dang die jingdie ne ngi dang leh kano kano ka ba ngi leh kum ki 'riewpaidbah. U la ai nuksa da la ka rukom im ba ngi ngi dei ban ap barabor ia Mon ka jong u Blei bad ym ia kaba ngi kwah bad donkam. U la long u bajemnud bad ba jai jai wat ha ba u pynbeit ia ki jinghikai bakla, um ju ia nia um ju ia kawang ktieh, hynrei pyni beit ia ka badei hok ka jinghikai batynrai jong ka Balang.  U la ju ong "Shi shamoit ka kham khring bun ki skain ban ia ka shi klong ka vinegar"

Ki ktien im sngi jong U "To Hikai phi na nga ba nga long basngewrit bad jemnud ka dohnud" na Mt. 11:29. U la ioh ruh ia ka nam "Gentleman Saint".

Kine ki dei kiei kiei kiba ki lyngdoh ha kine ki lai sngi ki la pashat ha ngi ki 'riewngeit.

Marcel Myrthong
President
Evangelisation
Mother of Compassion Parish
Mawkhlam, Nongstoin Diocese,
West Khasi Hills District,
Meghalaya - 793119.   (marc.myrthong@gmail.com)